網購新潮 @ 明星靚相大分享☆

雖然近年網購勁hit，不過淘寶七月中開始實施麻煩付款政策，加上團購愈來愈多騙案，令人對網購起戒心。
一雞死一雞鳴，新的網購玩法開始出現，包括：直上海外網上商店搶購新一季時裝或掃平貨；俾百零蚊月費，就可以收到物超所值的化妝及護膚品tester。
等於可以隨時網上遊盡世界名店，買個痛快。

David　40歲　廣告sales兼潮流專欄作家
潮流服飾專欄作家，成日要留意外國最新時裝資訊，網購更是必然的習慣，可以在屋企24小時涼住冷氣舒舒服服上網尋寶，減少出街shopping同人迫。

網購直送
回憶三年前剛開始越洋網購歐洲品牌服飾，David話要打盡人情牌，「就算想幫襯香港行貨，但新一季時裝通常頭批返貨量少，我著的嘅熱門size（中碼）不到半日就會斷貨，等第二批貨返起碼要等多個幾月。對於要緊貼潮流前線的我來講，款式更新夠快、貨量又多的網購是best choice。不過當時大部分時裝品牌都不會寄貨去香港，所以要搵外國朋友代購，麻煩到人。」上年朋友推介「Mr Porter」（http://www.mrporter.com）網站給他，不單提供香港送貨，內裡亦收錄Burberry（http://www.burberry.com/）、
Church's（http://www.church-footwear.com/）、
Paul Smith（http://www.paulsmith.co.uk/shop/home/）、
Gucci（http://www.gucci.com/cn-en/home）等百幾個著名品牌的服飾，「購買意慾即刻大增，足足花了幾日先睇得完。」

潮買平衫
第一時間買到新items外，David話每月仲慳到兩三成置裝費，「網上商店售價通常較平，加埋部分網站提供退稅服務，自然平過落香港專門店買。」即使最新一季時裝，平均都有一至兩成折讓，聽落已經好吸引，不過David話優惠不止於此，「網上商店成日有promotion，除了清上一季舊貨，仲有其他招數，例如預訂新一季服飾有七折、生日月份購物免運費，更加抵買。」David即指住身上的Viktor & Rolf（http://www.viktor-rolf.com）品牌恤衫，「Mr Porter原價賣三千二，大減價時連埋運費只是八百幾蚊，計落係兩三折！」

David推介
Mr Porter
網址：（http://www.mrporter.com）
運費：20英鎊（約$242）
送貨需時：3至4個工作天
國家：英國
主要賣男裝，有大量高級時裝品牌進駐，每月都有不同主題特價貨品，另有主力賣女裝的Net-A-Porter（http://www.net-a-porter.com）姊妹網站。

ASOS
網址：（http://www.asos.com）
運費：免費
送貨需時：11個工作天
國家：英國
搜羅價錢較大眾化的年輕服飾品牌貨物，最正是香港購買完全免運費。

Luisaviaroma
網址：（http://www.luisaviaroma.com）
運費：免費
送貨需時：4至5個工作天
國家：意大利
寄貨香港零運費，雖然售價只平香港專門店一成左右，但經常可以優先訂購新一季時裝。

Harrods
網址：（http://www.harrods.com）
運費：25英鎊（約$301）
送貨需時：6至10個工作天
國家：英國
英國大型百貨公司的網上商店，有齊服飾、化妝品同家品，種類繁多。提供埋退稅服務，價錢分分鐘可以再平多一成。

醒購兩招
雖然網購價錢吸引，不過David話都有以下兩點要注意： 1. 買返來的貨品不合心水，大部分網站都提供退貨服務，雖然會全數退回貨款，不過退貨運費仍需由買家承擔。 2. 用信用卡越洋網購，銀行會當作海外簽賬，需要另收手續費，費用約為簽賬額的1.5%，不過部分信用卡會有更高積分回贈，隨時賺得更多。

網購VS本地
Lanvin
Amalia quilted leather tote（http://www.net-a-porter.com/product/181043）
賣點：Lanvin上年推出的人氣真皮tote bag
網購連運費：Net-A-Porter•899.17英鎊（約$10,756）
本地：Lane Crawford•$15,300

Le Creuset
Round Cocotte Dish（28cm）（http://www.harrods.com/product/round-cocotte-dish-28cm/LE-CREUSET/000000000002605121）
賣點：法國星級鑄鐵煮食鍋，Harrods可以搵到香港代理都無返的淺藍色款式。
網購連運費：Harrods•118.75英鎊（約$1,433）
本地：Sogo專櫃•$2,488

Church's
London Leather Oxford Brogues（http://www.mrporter.com/product/301095）
賣點：英國傳統皮鞋品牌最經典款式
網購連運費：Mr Porter•232.77英鎊（約$2,805）
本地：Lane Crawford•$3,670

Burberry Brit
Pocket Front Slim-fit Denim Blazer（http://www.mrporter.com/product/182227）
賣點：今季最新款男裝外套，同步上架。
網購連運費：Mr Porter•353.33英鎊（約$4,250）
本地：Burberry專門店•$5,000

Gillian Wai　27歲　化妝師/美容blogger
鍾意扮靚再加上工作所需，一有新化妝、護膚產品推出都會即買試用，然後再寫blog同網友分享。上年十月開始每月訂購MyLuxBox（http://myluxbox.hk/）及
Glamabox（http://www.glamabox.com/hk/tc/）「月試盒」，內附五至六款不同品牌的最新化妝及護膚品tester，又慳錢又環保。

每月驚喜
「做化妝師多年，買一支化妝或護膚品，通常用不足十分一就會『換畫』，好浪費。上年年初發現美國Birchbox的新玩法，網友只要俾10美元（約$78）月費，每個月就會收到一盒內有五、六款化妝或護膚品的tester，望落好吸引。但香港人要搵代購公司先買到，都幾麻煩，最終無玩。點知上年十月MyLuxBox與Glamabox網站開張，玩法同Birchbox（http://www.birchbox.com/）一樣，但主要做香港人生意，所以即時入會試玩。」
Gillian說兩個網站的「月試盒」都會密封包裝，所以每次收到時都好似拆生日禮物般緊張，「先搖一搖個盒，聽聲估估裡面有乜，然後先開盒睇，每次都有驚喜。」
當初以為百零蚊月費只會送一些平價tester，點知竟有市面未推出或特別矜貴的化妝品，「就好似上個月就有加拿大高級品牌Euoko（http://www.euoko.com/）的緊緻去紋頸霜，原價50ml賣成四千幾蚊，送的tester都有10ml，計落值成千蚊。」
因為每個月至少都收到十幾件化妝或護膚品tester，她說可以大幅減少買新產品，「而家可以試完覺得好先買，減少製造垃圾，既慳錢又慳位，一定會keep住繼續玩。」

淘點作廢
七月十六日開始，淘點（http://taodot.now.com/）宣布用家不可再用淘點為
支付寶（https://www.alipay.com/）（淘寶的付費平台）賬戶充值，搞到不少用家怒氣沸騰。雖然用家仍可利用信用卡俾錢，但如果無信用卡，或對國內網上收費系統存疑，就未必夠膽繼續淘寶。想繼續為賬戶充值，原來仲有計。
方法好簡單，去OK（http://www.circlek.hk/）或
7-Eleven（http://www.7-eleven.com.hk/），
買一張面值100元人民幣的聯通充值卡（http://www.hkunicom.com/prepaid_sim_6.html）（約售$120），就可以在支付寶的充值版面上，點選「話費卡」充值，輸入卡號及密碼，就可以成功充值。不過，此方法並不對應300元人民幣面額的充值卡，要買幾百蚊貨，就要買多幾張充值卡先得。

兩盒比併
去年先至開業的MyLuxBox及Glamabox網站，兩間都只需要$108月費，就會每個月收到一盒「月試盒」，內有五至六款最新推出的高級化妝品或護膚品tester，價值超過四百蚊以上。

男女老幼　MyLuxBox 網址：http://myluxbox.hk 除了推出女士專用的「月試盒」，近月再開埋男士（$199）及親子（月費$95）line，更多選擇。明星效應　Glamabox 網址：http://www.glamabox.com 名模Lisa S.創立，Gillian覺得不少人因為明星效應而入會，但每月送的tester不夠MyLuxBox吸引。

facebook群組創立
NEXT 3.0除了繼續搜羅最新產品同潮流玩意，更特別開設Facebook群組，提供互聯網世界精彩新聞同產品情報。只要在Facebook以「NEXT 3.0」為關鍵詞搜尋，或以手機的「QR code」app掃描就搵到，而且全日更新，想睇更多新資訊，就要即刻加入。 ####

由頭到腳都在網上購得，慳慳埋埋每個月可以再買多幾件新衫。